عاشق الغربة

ناس كتير بترحل و تتغرب
و الكل بيقول الغربة تعبانى
وانا واحد من الناس..
لكن أنا و الغربة توأم..
اتنين و اتفقوا ف كل المعانى
قوليلى يا غربة..
هو انا عاشقك و لا انتى اللى عشقانى
كل ماقول توبة و كفاية ترحال..
أحن ليكى و اعود تانى
دا حب فيكى يا ترى و لا بلادى هى اللى كرهانى!!؟؟

صحيح يا غربة فيكى حاجات عجبانى
لكن ساعات..
باحس بحاجات ف بلادى كمان وحشانى
بيوحشنى ضل الشجر ف بلادى
بيوحشنى غنا الأفراح و البراح الفاضى
بيوحشنى لعب الشوارع و الملاغية مع الرايح كمان و الغادى
بتوحشنى عيون حبيبتى اللى كانت دوم معندانى
و ياما حاجات وحشانى..أنا مانسيتها لكن هى نسيانى

وعلى قد اشتياقى يا بلادى مبقاش فيكى عنوانى
متسألنيش ليه و تعملى نفسك قال عيزانى
لما الشجر يتحرق و ضلو يموت
لما الفرح يتخنق، و البراح يتزنق
و الغنا مايبقالو صوت..
لما لعب الشوارع يبقى مصارع
و الملاغية يملاها السكوت..
لما حبيبتى تبكيها و ترميها ف احضان غير احضانى
متسألنيش ليه عنوانى..بقا الغربة اللى سكنانى

أنا بارحل و اهمل صبايا ورايا و ادفن ف صدرى الأمانى
لا عمرى كفرت بيكى و لا ف يوم ضعف إيمانى
و لا خايف و لا طايش
ولا حابب ف غيرك أكون عايش
بس مغلوب ، و اللى غالبنى ضيق المعايش
مجروح أنا منك و جراحى مألمانى
لا نيلك بقى نيلك و لا ميته رويانى
محروم من خيرك..و مجبور على غيرك
و غيرك الغربة..!!! اللى بتروى حرمانى

يعنى الحكاية لاانا عاشق الغربة و لا الغربة عشقانى
كل الحكاية فيكى ناس عيزانى أمشى عميانى
و لو قلت افكر...!!!!!!!!!
يبقى الفكر مجنى عليه و ابقى أنا الجانى
أظن معذور لو قلت أنا عاشق الغربة..
حتى لو كانت هى مش عشقانى